Fortsätt till huvudinnehåll

Skrópasýki á bænadegi Dana

Mig langar smá að skrópa í vinnunni í dag og fara upp í sumarhúsið mitt (þangað er 15 mínútna akstur) og skrúfa frá krana og athuga hvort gamla þvottavélin virkar. Það sprungu nefnilega leiðslur og blöndunartæki í vetur (og vatn flæddi út á gólf) en nú er búið að laga pípurnar og aftur komið rennandi vatn í kranana. Það er samt ýmislegt sem þarf að laga, bæta og mála í sumarhúsinu sem telst líklega kofi miðað við íslenska sumarbústaði almennt. Mér skilst samt að svona A-hús séu mikið í tísku hjá retró-áhugafólki úti í heimi, ég fékk meira að segja póst í fyrra frá manni í útlöndum sem sá mynd af sumarhúsinu mínu á Instagram og bað mig að gefa sér upp málin á því, hann var að fara að byggja sér svona hús og var að velta fyrir sér hvað hann ætti að hafa stóran gólfflöt. Þetta þýðir sennilega að A-hús komast í tísku á Íslandi eftir tuttugu ár. En þá verður kannski búið að rífa þau flest. Svo þarf að hella úr safnhaugstunnunni og stinga upp beð og sá fræjum, já og stinga upp fullt af furuplöntum sem eru búnar að sá sér um allan móa. Ef ykkur langar í lítil furutré þá get ég reddað þeim. Kannski ætti ég bara að taka mér frí, það er frídagur í Danmörku í dag. Ég þarf líka að vinna á morgun, þá er ég búin að lofa að mæta í bókasafn í Garðabæ og lesa úr tveimur bókum. Annars ætti ég að skrifa nokkrar síður í rómaninum sem ég er að reyna að skrifa. Vandamálið með hann er að hann styttist í stað þess að lengjast. Um tíma var ég búin með fimmtán síður en síðan þurrkaði ég megnið af þeim út. Karl Ove Knausgård gæfi nú ekki mikið fyrir afköst mín við rómanskrifin, hann skrifaði lágmark tíu síður á dag þegar hann var að vinna að sex bóka ritröðinni um sjálfan sig.

Þetta er sumarhúsið í uppsveitum Reykjavíkur
Svona gróðurhús í viktoríönskum stíl á ég ekki en mig langar í það.

Kommentarer

  1. Den här kommentaren har tagits bort av skribenten.

    SvaraRadera
  2. Gaman að þessu lífsmarki. Við þurfum að fara að vísitera í uppsveitunum.

    SvaraRadera

Skicka en kommentar